Automobilgintzako Hiztegia aurkeztu dute gaur, sei enpresak elkarlanean sortu duten sektoreko hiztegi espezializatua

2014/07/10

Sektoreko terminologiaren inguruko 2.637 kontzeptu biltzen ditu hiztegiak, eta sei hizkuntzatan kontsultatu daiteke Interneten

BATZ, Cikautxo, Ekin, Elay, GKN eta Maier enpresek, Elhuyar Hizkuntza eta Teknologiako terminologia-adituen aholkularitzapean, Automobilgintza Hiztegi espezializatua osatu dute, sei hizkuntzatan: ingelesa, gaztelania, euskara, frantsesa, alemana eta txinera. Automobilgintzako 2.637 kontzeptu biltzen ditu hiztegiak, 16 alorretan sailkatuak, eta Interneten kontsultatu daiteke oso-osorik. Gaur goizean aurkeztu dute proiektua, Zornotzako Automotive Intelligence Center-en, hiztegian parte hartu duten enpresetako ordezkariek: Karmelo Uriarte, BATZeko hobekuntzako arduraduna; Gotzon Juaristi, Cikautxoko lehendakaria; Esteban Garitaonandia, Ekineko euskara-batzordeko koordinatzailea; Ketxus Amasorrain, Elayko ingeniaritzako arduraduna; Kepa Galparsoro, GKN Driveline Zumaiako prebentzio-arduraduna; Julen Madariaga, Maierreko lehendakaria eta, azkenik, Elhuyarretik, Leire Cancio zuzendari nagusia eta Garbiñe Alkiza, Automobilgintza Hiztegiaren koordinatzailea.

Azken urteetan, globalizazioaren aroak bultzatuta, automobilgintzako enpresek nazioarteko merkatura egin dute saltoa, eta «nazioartean izan dugun eta izaten ari garen esperientziak erakusten digu lehiakorrak izateko ezinbestekoa dela hizkuntzak egoki kudeatzea eta terminologia espezializatua eta bateratua erabiltzea», adierazi du Karmelo Uriarte BATZeko ordezkariak. «Komunikazio eraginkorra izan nahi badugu laneko prozesuetan, bezero eta hornitzaileekiko harremanetan eta langileen arteko harremanetan, hizkuntza-hesiak gainditzea da lehen pausua. Eta hori lortzeko, hiztegi espezializatu hau egiteko beharra ikusi genuen», erantsi du Uriartek.

Elhuyarrek ibilbide oparoa du terminologiaren arloan, eta teknologia aurreratuak garatu ditu hiztegigintzarako Hizkuntza eta Teknologiako I+G unitatean. «Elhuyarren garatu ditugun teknologiak aplikatuta, automobilgintzako sektorean harremanak egiteko mundu osoan erabiltzen diren hizkuntzak (ingelesa, gaztelania, frantsesa, alemana eta txinera) harremanetan jartzea lortu dugu, baita euskararekin ere, terminologia fidagarri, landu eta eguneratu bat eskainiz», adierazi du Leire Canciok. «Elhuyarren aspaldi gaude ohartuta eleaniztasunaren garrantziaz; horregatik, ezinbestekoa da hizkuntzak kudeatzeko baliabideak eta tresnak sortzea, enpresa bakoitzaren beharren arabera», gehitu du Canciok.

Azkenik, Garbiñe Alkizak Automobilgintzako Hiztegia egiteko eman diren pausoen berri eman du: «Sei enpresok gure esku utzi dituzte haien eguneroko lanean erabiltzen duten dokumentazioa eta barne-hiztegiak. Dokumentazio horretatik abiatuz, terminoen erauzketa automatikoa egin dugu, eta, hala, sei enpresetako terminologia erlazionatzea lortu. Terminoak kontzeptuka antolatu ditugu, sei hizkuntzetako ordainak eman, eta kontzeptu bakoitza dagokion arloan sailkatu dugu». Bestalde, «lan honetarako, ezinbestekoa izan da Elhuyarreko terminologoen eta automobilgintza-adituen arteko etengabeko elkarlana. Haiei esker, 2.637 kontzeptuak arloka sailkatu ahal izan ditugu, eta hizkuntza guztietako ordainak jaso» azpimarratu du Alkizak.

Hiztegi hau proiektu handiago baten hasiera baino ez da, eta automobilgintzaren sektorerako erreferentzia bihurtzea nahi dute sustatzaileek. Horregatik, hiztegia abiapuntutzat hartuta, automobilgintzako enpresen erakusleiho eta informazio-iturri izango den webgune bat sortu nahi dute. Hori dela eta, deia luzatu diete automobilgintzako beste enpresei, hemendik aurrera elkarlanean jarduteko.

http://www.elhuyar.org/EU/Prentsa-oharrak/Automobilgintzako-Hiztegia-aurkeztu-dute-gaur-sei-enpresak-elkarlanean-sortu-duten-sektoreko-hiztegi-espezializatua

Albiste erlazionatuak

KSI TEK programak hartu dio txanda KSI berritzaile programari: kultura eta sormen industrien digitalizazioa bultzatzeko diru-laguntzak izango dira

2021/03/10

Martxoaren 1etik apirilaren 30era bitartean eskabideak aurkezteko epea zabalik dago Sektorearen lehiakortasuna hobetzea eta produktu zein zerbitzu-berritzaileak garatzeko espazio berriak sortzea da helburua

Gipuzkoan Euskararen eragin ekonomikoa handitzeko lan-saioa egingo du Langunek Euskalgintzako eragileekin batera

2021/02/22

Gipuzkoan Euskararen eragin ekonomikoa handitzeko aurrera begirako lan-lerroen proposamena landuko du Langunek Euskalgintzako eragileekin batera. Data: Martxoak 18 Lekua: Tabakalera Ordua: 09:00etan

Euskarabildua jardunaldiak datuen zaintza eta pandemiak eragindako egoeran teknologia burujabetzak egin ditzakeen ekarpenak izango ditu hizpide

2020/10/27

Urriaren 29an izango da Donostiako San Telmo Museotik eta online bidez jarraitu ahalko da azkenean. “Datuen izurria. Zer ari da gertatzen gure pribatutasunarekin pandemia garaian?” da aurtengo edizioaren izenburua. Bere momentuan modu presentzialean burutzeko intentzioa bazegoen ere egoerak eraman du aldaketara. Jardunaldia bere osotasunean eskaintzeko helburuarekin, izena eman dutenei egunean bertan banatuko zen karpeta eta jardunaldiaren material osagarria etxean jasotzeko aukera emango zaie eta material honetan egongo dira ikusgai laguntzaileak.