Eskura dago UZEIren Sinonimoen Hiztegiaren plugin berria

2011/09/27

Hiztegiaren edukia eguneratu egin da eta plugina MS Word eta LibreOffice/OpenOffice-rako prestatu da

Bi berrikuntza ditu lehendik ere eskura genuen hiztegi honek:

  1. Hiztegiaren edukia eguneratu egin da, Euskaltzaindiaren arau berrien argitan datuak berrikusi, moldatu eta osatu dira, eta informazio-iturriak ere ugaritu egin dira azken urteotan. Sinonimoen kopuruak pixka bat egin du gora, baina ez gehiegi. Orain 25.505 forma sinonimodun jasotzen ditu hiztegiak eta, aurreko bertsioan bezala, euskalki- eta erabilera-markak jasotzen ditu idazkeraren estiloa gordetzen laguntzeko.
  2. Plugina MS Word eta LibreOffice/OpenOffice-rako prestatu da, erabiltzaileen gehiengoa kontuan hartuta.
    1. MS Word 2003, 2007 eta 2010
    2. LibreOffice / OpenOffice: Windows (32 bit, 64 bit) eta Linux.

Dokumentu bat idazten ari garenean, botoi laguntzailearekin hitzaren gainean klik egin eta sinonimoa eskuratzeko aukera dugunez, errazago joko dugu sinonimoaren bila, beste inora bila joaten ibili gabe. Klik batean hiztegia aberasteko aukera ematen digu pluginak.

Formaren sinonimoa lortzen dugu, ez hiztegi-sarrera bera. Alegia, “bukatu”ren sinonimoa bilatzen badugu, baina testuan “bukatzeko” idatzi badugu, bueltatuko diguna, besteak beste, “amaitzeko” izango da, ez “amaitu” hutsa. Beraz, nahi dugun hitzaren gainean sinonimoa eskatu eta ordezteko esanda, idazten jarrai dezakegu, programak hitzaren analisia egiten baitu, bai eta sinonimoaren sorkuntza ere.

Helbide honetan eskura dezakezue plugin berria: http://www.kultura.ejgv.euskadi.net/r46-17894/eu/contenidos/informacion/euskarazko_softwarea/eu_9567/plugin.html.

Hortik aurrerakoa, erabiltzailearen esku dago. Ea gustuko duzuen!

Albiste erlazionatuak

Euskarabildua jardunaldiak datuen zaintza eta pandemiak eragindako egoeran teknologia burujabetzak egin ditzakeen ekarpenak izango ditu hizpide

2020/10/27

Urriaren 29an izango da Donostiako San Telmo Museotik eta online bidez jarraitu ahalko da azkenean. “Datuen izurria. Zer ari da gertatzen gure pribatutasunarekin pandemia garaian?” da aurtengo edizioaren izenburua. Bere momentuan modu presentzialean burutzeko intentzioa bazegoen ere egoerak eraman du aldaketara. Jardunaldia bere osotasunean eskaintzeko helburuarekin, izena eman dutenei egunean bertan banatuko zen karpeta eta jardunaldiaren material osagarria etxean jasotzeko aukera emango zaie eta material honetan egongo dira ikusgai laguntzaileak.

Ekitaldi kulturalen hizkuntza kudeaketak Kultura Ministerioko diru laguntza lortu du

2020/10/20

Langunetik ekitaldi kulturalen hizkuntza kudeaketa hobetzeko garatzen ari den proiektuak Kultura Ministerioko modernizaziorako diru laguntza lortu du.

Lacunzak eta Mondragon Linguak KSI Berritzaile programan parte hartuko dute

2020/09/24

KSI Berritzaile programaren barruan proiektu bat aurkeztu dute Lacunzak eta Mondragon Linguak Vicomtech-ekin batera lantzeko. LANGUNEko hiru kideak, online kurtsoak hobetuko dituen sistema bat jarri nahi dute martxan.