'Lingua Gaztea', #gaztea eta @mondragonlingua -rekin ingelesa ikasteko ekimen entretenigarria

2014/02/17

Lingua Gaztea, momentuko abesti ezagunen letrak oinarri hartuta ingelesa ikasteko ekimena, jarri dute abian Gazteak eta MondragonLinguak


Lankidetzari, Jon Lamarka Gazteako koordinatzaileak eta Joseba Bartolome MondragonLinguako Komunikazio eta Marketing arduradunak hitzarmena sinatuz ekin diote. Gustura agertu dira biak hasitako bidearekin: EiTBko irrati gazteak eta ingelesa irakasten eskarmentu zabala duen akademiak ahaleginak batzeak emaitza onak izango dituela adierazi dute.

Momentuko ingelesezko kanturik arrakastatsuenak hartuko dituzte oinarri Lingua Gaztean, Gazteako zerrendetan entzuleek gustukoen dituzten abestiak, alegia. Astero, hit baten letra aztertuko dute, eta kantu bakoitzeko ingeleseko esamolde bat ulertu eta ikasteko aukera eskainiko du tarteak. Avici, Imagine Dragons, Eminem eta Rihanaren kantu arrakastatsuenak aukeratu dituzte, besteak beste.

Gaztean izango da Lingua Gaztea entzungai; adierazpen txiki bat eta kantuan nola erabiltzen den azalduko ditu Olatz Arsuaga irakasleak, eta jarraian, kantua oso osorik entzungo dugu, esamoldea nola erabili den ikasteko. Halaber, irratian entzundakoaren osagarri, Gazteak eta Mondragon Linguak bere web atarietan gune bat garatuko dute. Bertan, kantuaren bideoklipa eta ariketak jarriko dira, jolas moduan, entzuleek lezioa ikas dezaten.

Jolasa da helburua: musikak ingelesa modu entretenigarrian erakusteko aukera ematen baitu asmo honek. Gazteek gogokoen dituzten momentuko abestien esanahia landuz, hizkuntzaren esamoldeak kantuen bitartez ikasiz.

MondragonLinguak bere esperientzia jarriko du asmo honetan: "Ingelesaren irakaskuntza bizi, hurbila eta gizarteari lotuta izateko ahalegin ezin hobea dela deritzogu", dio Joseba Bartolomek, MondragonLinguako arduradunak.

Lehen aldiz, irratiz eta euskaraz ingelesa irakasten

"Badakigu irrati entzule gazteak euren abesti kuttunen letra eta itzulpenen bila ibiltzen direla. Beraz, Lingua Gaztea eskari bat betetzera dator. Gainera, lehen aldiz, irratiz ingelesa ikasteko euskara da abiapuntua", azpimarratu du Lamarkak. "Egungo gazte askok ingelesa ondo ulertzen dute, baina esamoldeak eta hitz jokoak ikasi nahi ditugunean, zailtasunak topatzen ditugu. Zergatik erabiltzen da halako estruktura? Edo, zer esan nahi du esamolde honek testuinguru honetan? Horixe da gure helburua: jolasean, eta hain gogoko ditugun artisten eskutik, ingelesaren ezagutza zabaltzea, euskararen eskutik gainera."

Lingua Gazteak, hasteko, proposamen hauetako bat izango du astero: The Lumminers-en 'Ho Hey', Avicciren 'Hey Brother', Pink ft. Nate Ruess-en 'Just Give Me A Reason', Pharrell Williams-en ' Happy', Imagine Dragons-en 'Demons', Eminem ft. Rihanna-ren 'The Monster Lorde' eta Royals Bastille-ren 'Of The Night'.

http://www.mondragonlingua.com/formacion/eu/albisteak/albisteak/lingua-gaztea-gaztea-eta-mondragonlinguarekin-ingelesa-ikasteko-ekimen-entretenigarria

Albiste erlazionatuak

KSI TEK programak hartu dio txanda KSI berritzaile programari: kultura eta sormen industrien digitalizazioa bultzatzeko diru-laguntzak izango dira

2021/03/10

Martxoaren 1etik apirilaren 30era bitartean eskabideak aurkezteko epea zabalik dago Sektorearen lehiakortasuna hobetzea eta produktu zein zerbitzu-berritzaileak garatzeko espazio berriak sortzea da helburua

Gipuzkoan Euskararen eragin ekonomikoa handitzeko lan-saioa egingo du Langunek Euskalgintzako eragileekin batera

2021/02/22

Gipuzkoan Euskararen eragin ekonomikoa handitzeko aurrera begirako lan-lerroen proposamena landuko du Langunek Euskalgintzako eragileekin batera. Data: Martxoak 18 Lekua: Tabakalera Ordua: 09:00etan

Euskarabildua jardunaldiak datuen zaintza eta pandemiak eragindako egoeran teknologia burujabetzak egin ditzakeen ekarpenak izango ditu hizpide

2020/10/27

Urriaren 29an izango da Donostiako San Telmo Museotik eta online bidez jarraitu ahalko da azkenean. “Datuen izurria. Zer ari da gertatzen gure pribatutasunarekin pandemia garaian?” da aurtengo edizioaren izenburua. Bere momentuan modu presentzialean burutzeko intentzioa bazegoen ere egoerak eraman du aldaketara. Jardunaldia bere osotasunean eskaintzeko helburuarekin, izena eman dutenei egunean bertan banatuko zen karpeta eta jardunaldiaren material osagarria etxean jasotzeko aukera emango zaie eta material honetan egongo dira ikusgai laguntzaileak.