LANGUNEk euskal enpresetako hizkuntzen erabilera, kudeaketa eta trebakuntzari buruzko erretratua aurkeztu du #langune_TrebetasunJardunaldia

2012/09/18

Ingelesaren ingurukoak dira trebakuntza gehienak (enpresen % 87,6); ondoren, frantsesa (% 35,4) eta alemana (% 19,4) datoz. Euskara, enpresen % 14,8aren trebakuntza-helburuetan dago, nahiz eta zerbitzuen sektorean % 26,4ra igotzen den ehunekoa

2012ko lehen seihilekoan egin den azterketa hori LANGUNEk sustatu du, eta Lanbide-Hobetuzek finantzatu du, Ikertalderekin elkarlanean.

Azterketaren helburua izan da euskal enpresetako hizkuntzen erabilerari, kudeaketari eta trebakuntzari buruzko erretratu eguneratua egitea, enpresaren ikuspuntutik, langile/ikaslearenetik eta hizkuntza-industriako profesionalen ikuspuntutik. Horretarako, 437 enpresak, hizkuntzak ikasten dituzten 300 langile/ikaslek eta hizkuntzen industriako hogeita hamar bat profesionalek parte hartu dute.

“Globalizazio ekonomikoaren prozesuaren eraginez, atzerriko hizkuntzetan hizkuntza-gaitasuna izatea oinarrizko bihurtu da enpresarentzat, ezinbesteko tresna bat. Hala ere, gure enpresa-sarearen ehuneko esanguratsu batek negozio-aukerak galtzen ditu, testuinguru horretara ez moldatzeagatik”, azpimarratu dute LANGUNEtik.

Azterketaren bidez lortu den erretratuak erakusten duenez, euskal ETEak "trantsizio-egoeran" daude. Enpresak kanpoko merkatuetara nahikoa ireki eta eleaniztasuneko prozesuan aurrera egiten bada ere, “oraindik ez ditu barneratu hizkuntza-gaitasunak eguneroko kudeaketa-dinamikan”. Erretratu horretatik abiatuta, LANGUNEk hainbat lan-lerro zehaztu ditu euskal enpresen lehiakortasunaren alde egingo duten eleaniztasun-estrategiak sustatzeko eta hedatzeko. 

Egoera hori aldatzeko, LANGUNE ezinbestekotzat jotzen du hiru agentek batera lan egitea eleaniztasun horren alde: enpresa-sarea eta langileak; hizkuntza-zerbitzuen eskaintza; eta erregulatzen eta bideratzen duen administrazioa. Hiru agenteek hauetan egin behar dute ahalegin berezia:

  • Enpresan hizkuntza-zerbitzuen eta gaitasunaren eskaerari buruz sentsibilizatzea, sustatzea eta aberastea.
  • Hizkuntza-zerbitzuak indartzea eta haien lehiakortasuna hobetzea.
  • Eleaniztasunari laguntzeko politikak enpresen nazioartekotzeari laguntzeko politikekin txertatzea, lehentasun estrategiko gisa.
  • Hizkuntzen esparruan lan egiteko trebakuntzari laguntzeko esparrua moldatzea eta hobetzea.

EMAITZAK

  • Inkestan parte hartu duten euskal enpresen % 27k uste du globalizazioak eragin negatiboa duela, % 23,4k uste du eragina positiboa dela, eta % 35,5ek dio ez diola inolaz ere eragiten.
  • Enpresen % 62,7k du webgunea ingelesez; % 34,1ek, frantsesez; eta % 18,2k, alemanez. Gainerako hizkuntzei dagokienez, oso gutxi agertzen dira. Logikoa denez, webgunea atzerriko hizkuntzetan duten enpresen artean gehiago dira esportatzen dutenak esportatzen ez dutenak baino (% 84,6 eta % 34,8, hurrenez hurren).
  • Itzulpen-zerbitzuak eskaera handiko elementua dira euskal enpresen artean. Oro har, aztertutako laginaren % 27,9k erabili ditu azken bi urteetan.
  • Itzultzaile automatikoak: enpresa esportatzaileen % 58,6k adierazi du azken bi urteetan erabili dituela, eta enpresa ez-esportatzaileen artean, berriz, % 24,3k.
  • Aholkularitza espezializatuko zerbitzuak: aurreko zerbitzuekin alderatuz gero, oso erabilera mugatua dute enpresa-aholkularitza espezializatuen zerbitzuek (esportazio-lanei, kanpoko merkatuen azterketari, hizkuntzen kudeaketari eta abarri lotuta daudenek). Azken bi urteetan, enpresen % 6k erabili du; esportatzaileen artean, % 10,6ra igotzen da proportzioa.
  • Enpresen % 50,1ek uste dute haien zuzendariek atzerriko hizkuntzak jakiteko behar handia dutela; teknikarien eta administratzaileen artean, behar txikiagoa aitortzen dute (% 49,7 eta 48,7, hurrenez hurren); eta are txikiagoa, tarteko nagusietan (% 36,4), langile kualifikatuetan (% 22,7) eta langile ez-kualifikatuetan (% 7,8). Logikoa denez, behar-mailak askoz handiagoak dira enpresa esportatzaileetan ez-esportatzaileetan baino.
  • Inkesta egin duten enpresen % 38,2k uste du euskararen erabilera lehia-abantaila bat dela; bereziki, zerbitzuetan (% 40,1; industrian, aldiz, % 36,4). Enpresa-zerbitzuen % 46,8k eta enpresa industrialen % 26,4k badituzte material komertzialak euskaraz. Eta, webguneei dagokienez, proportzioak % 36,4 eta % 20,6 dira, hurrenez hurren.
  • Enpresaren barneko harremanen kasuan, berriz, % 53,8an gaztelania hutsez egiten dira, eta % 41,4k dio elebidunak direla (euskara/gaztelania). % 1,6 euskaraz soilik komunikatzen da.
  • Inkesta bete duten enpresen % 61,1ek hizkuntza-gaitasunak kontuan hartzen ditu langileak hartzeko prozesuetan faktore bereizle gisa —ehunekoa handiagoa da enpresa esportatzaileetan—. Eta, enpresa esportatzaileen kasu zehatzean, faktore horrek prozesuan duen garrantzia % 88,9ra igotzen da.
  • Enpresen ia % 48k egin du azken bi urteetan hizkuntza-gaitasunetan trebatzeko jardueraren bat. Ingelesaren ingurukoak dira trebakuntza gehienak (enpresen % 87,6); ondoren, frantsesa (% 35,4) eta alemana (% 19,4) datoz. Euskararen inguruko trebakuntzak enpresen % 14,8an egiten dira, baina, zerbitzuen kasuan, % 26,4ra igotzen da ehunekoa.
  • Enpresen % 80k dio bere langileen hizkuntza-gaitasunak ezagutzen dituela, eta % 39k dio informazio hori nahiko formalizatua duela. Hala ere, enpresen % 37,1ek ez du arduradun zehatzik hizkuntza-gaitasunen kudeaketarako.

Laburpen exekutiboa: https://www.yousendit.com/download/WUJhb3BLV3JubHlKUmNUQw
Argazkiak: http://www.flickr.com/photos/langune/sets/72157631564810865/

Albiste erlazionatuak

Languages Lanean hizkuntza kudeaketari buruzko l. nazioarteko kongresua egingo da Bilbon urtarrilaren 18an eta 19an

2023/12/15

LANGUNE kongresuko idazkaritza gestionatzen du eta era berean ekitaldiko laguntzailea da.

LANGUNE Euskararen Nazioarteko Egunaren ekitaldian

2023/12/04

Lohitzune Txarola: "Euskadiko hizkuntza industria indartsua da, eta beste hizkuntza batzuk guri begira daude”.

Langune eta bere bazkideak BDCC Ostegunetan

2023/12/01

Euskal KSIetan euskara sustatzeko bide berritzaileak aztertu ziren azaroaren 23an egindako BDCC Ostegun saioan.