EIZIE: ‘31 eskutik’ bloga, hogeitamaikakoa osatzear

2012/11/08

Urriaren 15ean abiarazi zuen EIZIEk 31 eskutik bloga (@31eskutik), eta gaurkoarekin hogeita hiru post edo ekarpen argitaratu ditu, beste horrenbeste kidek idatziak. Datozen zortzi egunetako testuekin, beraz, hilabetea osatuko du blogak, eta lehenbiziko itzulia egina izango dute 31 kideek: plazara aterea izango da hogeitamaikako osoa

Blog berria hizkuntza-kalitatearen inguruko gogoeta labur eta proposamenak trukatzeko eta elkarrizketarako plaza izateko sortu du EIZIEk. Egunero-egunero, euskararen erabilerari buruzko testu bat argitaratuko da, helburu gutxi-asko didaktikoz idatzia. Norabidea hori izanik betiere, hogeita hamaika blogarietako bakoitza aske izango da nahi duen alderditik jotzeko. Guztion artean, 31 eskutik tresna zabala, irekia eta lankidetzazkoa izan dadin ahaleginduko gara.

Blogarien artean, badira itzultzaileak, zuzentzaileak, interpreteak, idazleak, irakasleak, hiztegigileak, ikertzaileak… Badira erakunde publikoetan lanean ari direnak, badira erakunde pribatuetakoak eta autonomoak. Euskarazko testugintzan diharduen eta aldi berean testugintza horri begi kritikoz erreparatzen dion langile-multzo askotarikoa ari da 31 eskutik-en, auzolan moduko batean. Hemen ageri dira izen guztiak: hogeita hamaika eskuak (gaurkoz 23). EIZIE elkartearen izenean, mila esker eta zorionak denei.

Zuk ere, irakurle, baduzu zer egina: segitu gurpilari egunez egun, eta parte hartu blogean, irakurriz eta erantzunez.

Hiru asteotan, batez beste 400 ikustaldi inguru izan ditu blogak egunean, eta irakurleen ia 50 erantzun eta iruzkin jaso ditu. Kopurua apalagoa izan da jaiegunetan, baina horrek ez du ezinbestean esan nahi asteburuetan argitaratutako ekarpenak gutxiago irakurtzen direnik.

Lehendik ere baditu EIZIEk sareko zenbait tresna, itzultzaile-zuzentzaileentzat eta oro har testugile eta gainerakoentzat zerbitzu eta ikasbide izan nahi dutenak. Ezagunenetakoa, ItzuL posta-zerrenda, 1.000 harpidedun baino gehiago biltzen baititu, noiznahi elkarri laguntzeko. Horrekin batera, martxa geldiago batean, 2tzuL sare-argitalpena, zeinetan urtean lauzpabost lan ertain argitaratzen baitira, hizkuntza-gaien ingurukoak (batzuetan ItzuLeko hazi batetik sortuak). Sarean da, orobat, Langintza xeheki atala, non argitaratzen baitira zenbait itzulpenen analisi luzeak.

http://www.eizie.org/News/1352287584
http://31eskutik.com/

Albiste erlazionatuak

Lacunzak eta Mondragon Linguak KSI Berritzaile programan parte hartuko dute

2020/09/24

KSI Berritzaile programaren barruan proiektu bat aurkeztu dute Lacunzak eta Mondragon Linguak Vicomtech-ekin batera lantzeko. LANGUNEko hiru kideak, online kurtsoak hobetuko dituen sistema bat jarri nahi dute martxan.

Ekitaldi kulturaletako hizkuntza kudeaketa ikertu eta hobetzeko erantzun berritzaileak

2020/09/01

Langunek ekitaldi kulturaletako hizkuntza kudeaketa ikertu eta hobetzeko erantzun berritzaileak eskainiko ditu. Euskal Herria oso aberatsa da ekitaldi kulturaletan, gizarte eleanitza izanik, ekitaldi hauek hizkuntza kudeaketa indartsu bat behar dute, eta beraien aurrekontuaren zati handi bat alor horretara dago zuzenduta.

Gipuzkoako barne-produktu gordinaren % 5,34 dago euskararekin lotuta, eta EAEko % 4,59

2020/03/16

Sektore produktibo gisa euskarak termino ekonomikoetan duen balioa kuantifikatu du Langunek, lurraldeko ekonomian zer pisu duen jakiteko. Gipuzkoan euskarak duen eragin ekonomikoa eta hizkuntzen industriak EAEn duen egoera aztertu dituen txostenaren emaitzak ezagutzera eman dituzte Foru Aldundiko Etorkizuna Eraikiz gunean, lurraldeko Euskararen Foroak legealdi honetan egindako lehen bilkura probestuz. 2020/02/13 da benetako argitaratzen data