Languneren eta Euskaltzaindiaren arteko lankidetza hitzarmena

2012/05/02

Langune Hizkuntza Industrien Elkarteak eta Euskaltzaindiak bi erakundeen arteko lankidetza-hitzarmena sinatu dute Bilbon, Akademiaren egoitzan. Langunearen izenean Josu Waliño presidenteak sinatu du, eta Euskaltzaindiarenean Andres Urrutia euskaltzainburuak. Gainerako euskaltzainekin batera -sinatze ekitaldia osoko batzarraren atsedenaldian egin da- Fernando Alana Languneko zuzendaria ere hor izan da.


Bai Josu Waliñok, baita Andres Urrutiak ere, gaurko ekitaldia "pozgarria" dela esan dute. Horretaz gain, etorkizunean hitzarmena egoki garatuko den esperantza adierazi dute biek. Urrutiak esan duenez, "badaukagu zer konpartitu eta zertan lan egin, espero dezagun hau zehaztea eta gauzatzea proiektu jakin batean".

Hitzarmen horrek bi urteko iraupena izango du eta bere xedea hizkuntza gaietako ekimenak gauzatzea, garatzea eta zabaltzea izango da. Bi erakundeon arteko elkarlana euskararen normalizaziorako proposatzen diren egitasmoen inguruan gauzatuko da, teknologia berrien arloan euskararen presentzia eta erabilera areagotzera bideratutako proiektuen inguruan batez ere.

Horretaz gain, hauek dira hitzarmenaren ildo nagusiak:

  • Langunek antolatzen dituen ikastaro, jardunaldi, mintegi, aholkularitza, eta bereziki hizkuntzaren jakiteari zein erabilerari dagokien prestakuntzan, Euskaltzaindiaren gramatika, lexiko, ortografia, toponimiari eta euskalkien erabilerari buruzko irizpideak aintzat hartuko ditu, eta hauek zabaltzeko moduak landuko ditu. Prestakuntza arlo horretan Euskaltzaindiak parte hartuko du, egitasmo bakoitzean adosten den eran.
  • Langunek Euskaltzaindiari egingo dizkio gramatika, lexiko, ortografia, toponimia eta euskalkien erabileraren inguruko kontsultak, eta Euskaltzaindiak kontsulta horiei erantzuna emango die.
  • Bi erakundeok publikatzen dituzten argitalpenak elkarren artean trukatuko dituzte. Gainera, argitalpen-egitasmoak partekatuko dituzte.
  • Erakunde biok erraztasunak emango dizkiote elkarri egoitza nahiz azpiegitura erabiltzeko, adosten dituzten ekintzetan baliatzeko.

Helburu hauek lortzeko, Languneak eta Euskaltzaindiak Jarraipen Batzordea sortuko dute, erakunde bakoitzeko bina kide izango dituena.

http://www.euskaltzaindia.net/index.php?option=com_content&catid=121&id=3836&lang=eu&view=article

 

Albiste erlazionatuak

Gipuzkoako barne-produktu gordinaren % 5,34 dago euskararekin lotuta, eta EAEko % 4,59

2020/03/16

Sektore produktibo gisa euskarak termino ekonomikoetan duen balioa kuantifikatu du Langunek, lurraldeko ekonomian zer pisu duen jakiteko. Gipuzkoan euskarak duen eragin ekonomikoa eta hizkuntzen industriak EAEn duen egoera aztertu dituen txostenaren emaitzak ezagutzera eman dituzte Foru Aldundiko Etorkizuna Eraikiz gunean, lurraldeko Euskararen Foroak legealdi honetan egindako lehen bilkura probestuz. 2020/02/13 da benetako argitaratzen data

Mintegia (abenduak 10): Hizkuntza teknologien aplikazioa RIS3an

2019/12/02

Tokia: Innobasque (Bizkaiko Parke Teknologikoa, Laida Bidea 203. Eguna: Abenduak 10 (goiza). Antolatzailea: Langune.

Hizkuntza Naturalaren Espainiako Elkartearen Nazioarteko XXXV. Biltzarra

2019/07/15

Irailaren 24tik 27ra bitartean, Hizkuntza Naturalaren Espainiako Elkartearen Nazioarteko XXXV. Biltzarra egingo da. Euskal Herriko Unibertsitateko Aholab eta Ixa ikerketa-taldeek antolatuta, Bilboko Bizkaia Aretoan izango da.